نصائح حول المراجعة الباگ2017

نصائح حول طريقة المراجعة
كاين ناس بزاف راهي تقول ماناش قادرين نقراو .. ماناش لاحقين .. مابديناش .. كيفاه نديرو باه نقراو .... اوول حاجة لازم ديروها هي انكم تنظمو وقتكم و كل ما تجيو تقراو خمو في الهدف تاعكم باه ماتحسوش بالتعب وتستمتعو بالدراسة ..
لي مزال مابداش يبدا نورمال ومايخممش في لي فات يخمم في لي مزال ..
بالنسبة لتنظيم الوقت ...
الاحرار لي راهم يقراو في الجامعة يحاولو يقراو كل يوم من 7 ل 12 يقسمو وقتهم على 3 من ساعتين لمادة علمية و ساعتين لمادة علمية اخرى و ساعة مادة ادبية ويحاولو ينوضو الصباح يحفظو شوي بعد الفجر ( و هذا يصلح ل النظاميين ايضا )
الاحرار لي مبلوكيين
يقدرو يقسمو وقتهم على 5 ساعتين الصباح للحفظ و 3 ساعات قبل الظهر مثلا للرياضيات و بعد العصر مثلا علوم و من بعد مادة ادبية ويختموها بالفيزياء ( الناس لي راهي مبلوكيا راه عندكم وقت ثميين ماتضيعوهش في الرقاد وتندمو مع الاخير لا باك لا عام مطلع )
كيفية المراجعة
*العلوم راجعو الدرس ملييح و افهموه ملييييح و ارسمو المخططات والرسومات التخطيطية حاولو تعلقوهم في الغرف تاوعكم باه تشوفوهم ديما قدامكم من بعد حلو تمارين حطو كراس الاسئلة الشائعة جاوبو عليهم شفهيا و كي تصادفكم فكرة جديدة اكتبوها اكتبو السؤال وتحتو الجواب.. اهم حاجة في العلوم هيي المنهجية ( انصحكم بالاطلاع على دروس وتمارين الاستاذ بوالريش )
*الرياضيات و#الفيزياء حلو تمارين الكتاب المدرسي وتبعو الاستاذ نور الدين والاستاذ عمار مولاي
التمارين كي تحلوهم لازم يكونو بالحلول باه ماتضيعوش وقتكم



*الانجليزية اطلعو على الدروس و حاولو تهزو فكرة على المقالات المقررة و حلو مواضيع البكالوريات السابقة
*الفرنسية تحتاج انكم تفهمو المصطلحات تاع كل وحدة خصوصا الوحدة الاولى و تتعلمو كيفاه ديرو compte rendu
*الادب حاولو تفهمو الدروس واطلعو على كيفية الاجابة عن كل سؤال على خاطر عندها منهجية خاصة
*الفلسفة ماهيش حاجة تخوف كيما راكم متصورينها ... تفهم يفهم الدرس و تحفظ المنهجية وبعض المقولات وعبر من عندك تدي مليح
ربي يوفقكم ان شاء الله .. حاجة ما راهي مستحيلة وحاجة ما تجي بارقاد اتعبو تلقاو تعبكم غدوة .. ولي فيها خير يجيبها ربي ان شاء الله ... دعواتكم ........الحنين للجنان